എ19 പ്രോ ചിപ്പില്‍ തയ്യാറാക്കിയിരിക്കുന്ന ഐഫോണ്‍ 17 പ്രോയില്‍ വേപ്പർ ചേമ്പർ കൂളിംഗ് സംവിധാനം അടങ്ങിയിരിക്കുന്നു
കാലിഫോർണിയ: ആപ്പിള്‍ ഏറ്റവും പുതിയ സ്‍മാർട്ട്‍ഫോണ്‍ ലൈനപ്പില്‍ ഐഫോൺ 17 പ്രോ അവതരിപ്പിച്ചപ്പോള്‍ തെളിഞ്ഞത് കരുത്ത്. പുത്തന്‍ ഡിസൈന്‍, 6.9 ഇഞ്ച് പ്രോ ഡിസ്‍പ്ലെ, 48 എംപി ട്രിപ്പിള്‍ ഫ്യൂഷൻ ക്യാമറകൾ, 18 എംപി സെന്‍റർ സ്റ്റേജ് സെല്‍ഫി ക്യാമറ, പുതിയ എ19 പ്രോ ചിപ്, വലിയ ബാറ്ററി, ഉയർന്ന ബാറ്ററി ലൈഫ്, ആപ്പിള്‍ ഇന്‍റലിജന്‍സ്, പുതിയത് ഉള്‍പ്പടെ മൂന്ന് നിറങ്ങള്‍, അലിമിനിയം ബോഡി, ആദ്യമായി വേപ്പർ ചേമ്പർ കൂളിംഗ്, സെറാമിക് ഷീല്‍ഡ് 2 കോട്ടിംഗ്, എന്നിങ്ങനെ ഗംഭീര ഫീച്ചറുകളോടെയാണ് ആപ്പിള്‍ ഐഫോണ്‍ 17 പ്രോ അവതരിപ്പിച്ചത്. ക്യാമറ കണ്‍ട്രോള്‍, ആക്ഷന്‍ ബട്ടണ്‍ എന്നിവയും ഐഫോണ്‍ 17 പ്രോയിലുണ്ട്.
ഐഫോൺ 17 പ്രോ സ്പെസിഫിക്കേഷനുകള്‍
ഡൂറബിളിറ്റി മനസില്‍ കണ്ട് ആപ്പിള്‍ നിർമ്മിച്ചതാണ് ഐഫോണ്‍ 17 പ്രോ. വലിയ 6.9 ഇഞ്ചാണ് ഡിസ്‍പ്ലെ സൈസ്. ഐഫോണുകളുടെ ചരിത്രത്തിലെ ഏറ്റവും വലിയ ബാറ്ററി 17 പ്രോയില്‍ ഉള്‍ക്കൊള്ളിച്ചിരിക്കുന്നു എന്ന് ആപ്പിള്‍ വ്യക്തമാക്കി. എ19 പ്രോ ചിപ്പില്‍ തയ്യാറാക്കിയിരിക്കുന്ന ഐഫോണ്‍ 17 പ്രോയില്‍ വേപ്പർ ചേമ്പർ കൂളിംഗ് സംവിധാനം അടങ്ങിയിരിക്കുന്നു. ഇതാദ്യമായാണ് ആപ്പിള്‍ ഐഫോണിലേക്ക് വേപ്പർ ചേമ്പർ കൂളിംഗ് സിസ്റ്റം കൊണ്ടുവരുന്നത്. സ്പേസ് ഓറഞ്ച് സഹിതം മൂന്ന് നിറങ്ങള്‍ പ്രോയുടെ മാറ്റ് കൂട്ടുന്നു. ടൈറ്റാനിയം ബോഡിക്ക് പകരം അലുമിനിയം ബോഡി ഉള്‍പ്പെടുത്തി.
ഐഫോൺ 17 പ്രോ ക്യാമറ ഫീച്ചറുകള്‍
ഫോട്ടോഗ്രാഫി, വീഡിയോഗ്രാഫി പ്രേമികളെ കയ്യിലെടുക്കുന്നതാണ് ഐഫോണ്‍ 17 പ്രോയുടെ ക്യാമറ ഫീച്ചറുകള്‍. 48 എംപി ഫ്യൂഷന്‍ അള്‍ട്രാ-വൈഡ്, 48 എംപി ഫ്യൂഷന്‍ ടെലിഫോട്ടോ, 48 എംപി ഫ്യൂഷന്‍ മെയിന്‍ ക്യാമറ എന്നിവയാണ് റിയർ ക്യാമറ വിഭാഗത്തിന്‍റെ കരുത്ത്. ഐഫോണ്‍ 17ല്‍ രണ്ടും എയറില്‍ ഒന്നും 48 മെഗാപിക്‍സല്‍ ക്യാമറയേയുള്ളൂ. 48 എംപിയുടെ പുതിയ ഫ്യൂഷന്‍ ടെലിഫോട്ടോ ക്യാമറയാണ് ഐഫോണ്‍ 17 പ്രോയില്‍ ഏറ്റവും ആകർഷണം. ഐഫോണ്‍ 17 പ്രോ 8എക്‍സ് ഒപ്റ്റിക്കല്‍ സൂം നല്‍കുന്നു. ഐഫോണുകളുടെ ചരിത്രത്തിലെ ഏറ്റവും വലിയ സൂം കപ്പാസിറ്റിയാണിത്. ഐഫോണ്‍ 17 പ്രോ 31 മണിക്കൂർ വരെ വീഡിയോ പ്ലേബാക്ക് നല്‍കും. ഐഫോണ്‍ 17 പ്രോ മാക്സില്‍ ഇത് 37 മണിക്കൂർ വരെയാണ്.
