ന്യൂയോര്‍ക്ക്: മനുഷ്യ മസ്‍തിഷ്‍കത്തെ ഹാക്ക് ചെയ്യാൻ പറ്റുമോ? ഈ ആശയം ഒരു സയൻസ് ഫിക്ഷൻ ആണെന്ന് പറഞ്ഞ് തള്ളിക്കളയേണ്ട. വളർന്നുവരുന്ന ബ്രെയിൻ-കമ്പ്യൂട്ടർ ഇന്‍റര്‍ഫേസ് (ബിസിഐ) സാങ്കേതികവിദ്യ ഇത്തരം സാധ്യതകളിലേക്ക് വിരൽചൂണ്ടുന്നുവെന്ന് ന്യൂറോസയൻസ് പഠനങ്ങൾ സൂചിപ്പിക്കുന്നു. ഉയർന്നുവരുന്ന ബ്രെയിൻ-കമ്പ്യൂട്ടർ ഇന്‍റർഫേസ് (ബിസിഐ) സാങ്കേതികവിദ്യ, ന്യൂറൽ ഡാറ്റ ഇന്‍റർസെപ്ഷൻ, സിഗ്നൽ കൃത്രിമത്വം, ന്യൂറോപ്രൈവസിക്കുള്ള ഭീഷണികൾ തുടങ്ങിയവ ഉൾപ്പെടെയുള്ള ആശങ്കകൾ ഉയർത്തുന്നുവെന്നാണ് പുതിയ ശാസ്ത്രീയ റിപ്പോർട്ടുകൾ ചൂണ്ടിക്കാട്ടുന്നത്.
ബിസിഐകൾ ഇൻവേസീവ് ഇംപ്ലാന്‍റുകളായാലും നോൺ-ഇൻവേസീവ് വെയറബിൾ സെൻസറുകളായാലും, ന്യൂറൽ സിഗ്നലുകളെ ഡിജിറ്റൽ കമാൻഡുകളാക്കി മാറ്റുന്നു എന്ന് മേരിലാൻഡ് യൂണിവേഴ്സിറ്റി ഗ്ലോബൽ കാമ്പസിന്‍റെ റിപ്പോർട്ട് പറയുന്നു. ഇത് പ്രോസ്തെറ്റിക് നിയന്ത്രണം മുതൽ ഗെയിമിംഗ് വരെയുള്ള ആപ്ലിക്കേഷനുകളെ പ്രാപ്‍തമാക്കുന്നു. അതേസമയം കോർണൽ യൂണിവേഴ്സിറ്റിയിൽ നിന്നുള്ള ഒരു പഠനം ഇതിൽ ഉൾപ്പെട്ടിരിക്കുന്ന നിരവധി സുരക്ഷാ അപകടസാധ്യതകൾ എടുത്തുകാണിക്കുന്നു. തലച്ചോറിൽ നിന്ന് ഒരു ഉപകരണത്തിലേക്ക് പകരുന്ന ചിന്തകളെ ഫലപ്രദമായി വായിക്കുന്നതിലൂടെ ഹാക്കർമാർക്ക് ന്യൂറൽ ഡാറ്റ സ്ട്രീമുകളെ തടസപ്പെടുത്താൻ കഴിയുമെന്ന് ഈ പഠനം പറയുന്നു.
ഇഇജി അടിസ്ഥാനമാക്കിയുള്ള ബിസിഐകളിൽ ഗവേഷകർ ഇത്തരം ‘പിൻവാതിൽ’ ആക്രമണങ്ങൾ നടത്തിയിട്ടുണ്ട് എന്നും ബ്രെയിൻ വേവ്-അനലിസിസ് അൽഗോരിതങ്ങളിൽ ചേര്‍ക്കുന്ന ചെറിയ തടസങ്ങൾ പോലും ഫലങ്ങളിൽ മാറ്റം വരുത്തുമെന്നും ഇത് കോച്ചിംഗ് ഉപകരണങ്ങൾ മുതൽ നിർണായകമായ മെഡിക്കൽ ഡയഗ്നോസ്റ്റിക്സ് വരെ എല്ലാത്തിനെയും സ്വാധീനിക്കുമെന്നും പഠനങ്ങൾ പറയുന്നു. കൂടാതെ, നാഡീ സിഗ്നലുകളുടെ സമഗ്രതയിൽ വിട്ടുവീഴ്ച ചെയ്യാനോ കൃത്രിമം കാണിക്കാനോ കഴിയും. ഇത് വികാരങ്ങളെയോ തീരുമാനങ്ങളെയോ പെരുമാറ്റത്തെയോ സ്വാധീനിക്കാൻ സാധ്യതയുണ്ട്. പാർക്കിൻസൺസ് രോഗം പോലുള്ള അവസ്ഥകൾക്ക് ചികിത്സിക്കാൻ ഉപയോഗിക്കുന്ന ഇംപ്ലാന്‍റ് ചെയ്ത ഡീപ്-ബ്രെയിൻ സ്റ്റിമുലേറ്ററുകൾ തലച്ചോറിന്‍റെ പ്രവർത്തനത്തെ നേരിട്ട് മാറ്റുന്നതിനായി ഹാക്ക് ചെയ്യപ്പെടാനും സാധ്യതകൾ ഉണ്ട്. ന്യൂറോ സ്വകാര്യതയും അപകടത്തിലാണെന്നും റിപ്പോർട്ടുകൾ പറയുന്നു. കാരണം ന്യൂറൽ ഡാറ്റ സെൻസിറ്റീവ് മെഡിക്കൽ അവസ്ഥകളെയോ സ്വകാര്യ ചിന്തകളെയോ വെളിപ്പെടുത്തിയേക്കാം എന്നും പഠനങ്ങൾ പറയുന്നു.
അതായത്, ശാസ്ത്രജ്ഞർക്കും സർക്കാരുകൾക്കും നമ്മുടെ ചിന്തകളിലേക്കും മാനസികാവസ്ഥകളിലേക്കും നുഴഞ്ഞുകയറാൻ കഴിയുന്ന ഒരു ഭാവികാലത്തിലേക്ക് ലോകം അതിവേഗം നീങ്ങുകയാണെന്നാണ് ടൈം മാഗസിന്‍റെ റിപ്പോർട്ടില്‍ പറയുന്നു. അതേസമയം, ഈ ഉയർന്നുവരുന്ന ഭീഷണികൾക്ക് മറുപടിയായി ന്യൂറൽ ഉപകരണങ്ങളെ സംരക്ഷിക്കുന്നതിനും ഉപയോക്തൃ സ്വയംഭരണം സംരക്ഷിക്കുന്നതിനുമായി സൈബർ സുരക്ഷാ തത്വങ്ങൾ, എൻക്രിപ്ഷൻ, സുരക്ഷിത പ്രോട്ടോക്കോളുകൾ തുടങ്ങിയ കാര്യങ്ങൾ ഉപയോഗിക്കുന്ന ന്യൂറോ സെക്യൂരിറ്റി മേഖല വികസിച്ചുകൊണ്ടിരിക്കുന്നുവെന്നും റിപ്പോർട്ടുകളില്‍ പരാമര്‍ശമുണ്ട്.
